الكالسيوم مكمل غذائي لمرضى الروماتيزم

ليه الكالسيوم مهم؟

• ٩٩٪ من الكالسيوم موجود في العظام والأسنان ومهم لقوة العظام والأسنان
• بعض العمليات الحيوية معتمدة في الأساس على الكالسيوم زي التوصيل في الأعصاب، زي افراز الهرمونات، زي الأنسولين، انقباض العضلات، انقباض الأوعية الدموية

طب أنا محتاج قد ايه كالسيوم في اليوم؟

المؤسسة الكندية للصحة بتقول ان البالغ محتاج من ١٠٠٠ إلى ١٢٠٠ملي جرام في اليوم، لكن لو مريض بياخد كورتيزون لأي سبب من الأسباب ممكن احتياجاته توصل من ١٢٠٠ الي ١٥٠٠ ملي جرام يومياً.

مصادر الكالسيوم:

• اهم حاجة ناخدها من الأكل، المكملات الغذائية كل ما ناخدها من مصادرها الأساسية كل ما كان أفضل والمصدر الأساسي للكالسيوم هو منتجات الألبان (كوب لبن ٢٥٠ ملي جرام-كوب زبادي-قطعة جبن ٥٠ ملي جرام) كل ده في ٣٠٠ إلى ٥٠٠ ملي جرام تقريباً نصف احتياجاتك من الكالسيوم.
• لو مش بناخد منتجات ألبان السمك بالذات المعلبات بعظمها ودي بتوصل إلى ٣٠٠ملي جرام كالسيوم.
• البقوليات والخضروات بالذات السبانخ ممكن توصل نسبة الكالسيوم فيها إلى ١٧٥ملي جرام
• العسل الاسود:١٥ جرام فقط من العسل الاسود فيهم ١٧٥ ملي جرام كالسيوم.

و مريضة روماتيزم ومش بتاكل اجبان خالص ومش، بتشرب لبن ومبتاكلش خضار :في الحالة دي هنستخدم مكملات غذائية من نوع كالسيوم كربونات وده لان ال ١٠٠٠ملي جرام تقريباً بتدي  ٤٠٠ملي جرام كالسيوم على عكس الأنواع الأخرى من المكملات الغذائية

ناخد قد ايه؟

لازم تعرفوا إن في المرة الواحدة مش بنمتص اكثر من ٥٠٠ ملي جرام وبالتالي لو هتاخد اكثر من قرص لازم تقسموا على اليوم وتاخدوا في وسط الأكل وتبعدوا عن الأدوية التانية اللي بتتعارض معاه زي أدوية السيولة، أدوية القلب، أدوية الغدة، أدوية المعدة.

الأعراض الجانبية لمكملات الكالسيوم:

• اشهر حاجة الامساك
• كبار السن لو الجرعة زادت عن ٢٠٠٠ملي جرام ممكن تؤدي لمشاكل في القلب وتصلب الشرايين.
• اللي عندهم مشاكل في الكلى أو حصوات في الكلى ياخدوا الكالسيوم بحذر ويرجعوا للدكتور قبل ما ياخدوه.

حاولوا دايما تاخدوا الكالسيوم من مصادره الطبيعية(منتجات الألبان منزوعة الدسم، لو مش قادرين ناخذه من مصادره الطبيعية هناخده من المكملات الغذائية اللي بتعتمد على الكالسيوم كربونات والدكتور يحدد الجرعة وناخذها في وسط الأكل ودمتم سالمين.