الروماتويد وارادة الشفاء
الروماتويد السلبي
أغسطس 11, 2022
التهاب العضلات والجلد المناعي
أغسطس 11, 2022
أبقراط بيقول قبل ما تعرف ايه نوع المرض الذي اصاب المريض ... اعرف ايه نوع الشخصية اللي اصابها المرض فهناك شخصية خارجية دائما ما بتلوم غيرها .. وهناك شخصية داخلية دائما عندها ثقة في نفسها ..
لازم تبقوا عارفين ان إرادة الشفاء عضلة زي عضلة في الجسم بتقوى وتضعف وإن هي محتاجة تدريب هنتكلم عليه في بعض الخطوات اللي لو استخدمنها ممكن تقوي عضلة الإرادة عندنا.
- خط اهداف صغيرة وحققها وخليها روتين كل يوم علشان لو اليوم كله ضاع يبقا اخر اليوم في إنجازات، الروتين ده ممكن يشمل مثلا ٥ إلى ١٠ دقائق رياضة، قرآءة، برنامج وثائقي، المهم اني أنجز حاجة كل يوم ده هيقوي القدرة على الإنجاز وهيقوي عضلة إرادة الشفاء.
- بسط حياتك خلي القرارت سهلة متضيعش طاقتك الشعورية وعضلة إرادتك في قرارات تافهة وخلي عضلة الإرادة تستخدم في الحاجات الكبيرة الي أهمها إرادة الشفاء.
- ابحث عن الدعم، الدعم من العائلة من الأصحاب بس صدق إن لو من جواك مفيش عضلة إرادة محدش هيقدر يساعدك، رتب أولوياتك وخلي اهم أولوية انك تكون سعيد وكويس ونشط وبالتالي الرياضة مطلوبة، الاسترخاء مطلوب، النوم المنتظم مطلوب، الاكل الصحي علشان عضلة الإرادة تقوى.
- أوقف نزيف المشاعر، ابعد عن الشائعات والنميمة كتير اوي مشاعرنا بتضيع في حاجات إحنا اصلآ ملناش علاقة بيها،رتب علاقاتك، العلاقات السامة تخلص منها، العلاقات المهمة المركبة تقدر تتكلم مع أطرافها علشان يتحملونا ويساعدونا في فترة تعبنا علشان كدة يبقا عندنا عضلة إرادة قوية ومرنة.
- ابعد عن أعداء الإرادة، أعداء الإرادة خمسة(الفزلكة-الحاجات الصغيرة - التفاصيل الكتير-الدماغ اللي مش بتقف-توقع الأسوء)
- اقرء قصص الناجحين، دور على شبكات الدعم على الإنترنت وشوف اللي قدروا انهم ينتصروا على المرض خد قصصهم، خد منهم نصائح واستخدمها علشان ده دايماً هيخليك انك تقدر تهزم المرض.
- متجريش ورا كل حد يقولك جرب كذا لأن ده بيستنزف طاقة كبيرة جداً.
عضلة الإرادة لها أصحاب يقوي إرادتك في الشفاء وهما:
(الصلاة على النبي- دعاء سيدنا يونس- صلاة الخاجة- كثرة الاستغفار-التوبة- صدقة السر)
إرادة الشفاء خلت مرضى كتير يغلبوا الأمراض سواء كانت روماتيزمية وحتى أورام المهم إنك تبقا فاهم إن هي عضلة تدربها وتبعد عنها اللي يضعفها وتستعين بشبكة الدعم بتاعتك اللي اولها دكتورك المعالج ودمتم سالمين.
