اعمل ايه في الشمس يا دكتور وانا عندي ذئبة حمرا

مرض الذئبة الحمرا بنسميه مرض عدو الشمس وده لأن الأشعة فوق البنفسجية ممكن جدآ تؤدي إلى نشاط المرض سواء في الجلد أو في الأجهزة الداخلية للجسم وبالتالي النصيحة الأساسية لمرضى الذئبة الحمرا قللوا من التعرض للشمس. طب اعمل ايه لو مضطرة اني أتعرض للشمس ١-لازم نستخدم واقي شمس يكون معدل الحماية فيه أكثر من ٥٠ ولازم نجدده كل ساعتين. ٢-مفيش مانع اننا نستخدم شمسية او طاقية تغطي الوجه علشان امنع الأشعة فوق البنفسجية انها تصل لمنطقة الوجه. طيب لو حصل اني اتعرضت للشمس وحصل احمرار بنحط مرهم يكون فيه كورتيزون واتواصل مع دكتور الروماتيزم او دكتور الجلدية علشان ده هيقلل جدآ من ان المرض ينشط بسرعة. هل الأشعة فوق البنفسجية موجودة في حاجات تانية ممكن تنشط المرض غير الشمس : ١-فيه دراسات بتقول ان النور الأبيض ممكن تنشط المرض وبالتالي هنخليها مش مباشرة علينا. ٢-الاشعة الزرقاء الموجودة في اللاب توب والموبيل ممكن جدآ يكون ليها تأثير على الأشعة فوق البنفسجية زي الشمس. ٣-ممكن جدآ الوقوف قدام اللهب لمدة طويلة ممكن يكون له نفس تأثير الأشعة فوق البنفسجية علشان كدة نصيحتنا نقلل استخدام الموبيل والنور الأبيض ونقلل الوقوف قدام اللهب طب هي الأشعة فوق البنفسجية دي مضرة فقط للجلد ولا ممكن تزود كمان نشاط المرض سواء على مستوى صورة الدم او مستوى الكلى ومستوى الأعصاب، الحقيقة بتنشط كل جوانب المرض وبالتالي مهم جداً لو اتعرضت للشمس اني ارتاح بعدها لفترة كافية واني أبلغ دكتوري، ممكن كمان اعمل تحاليل علشان نطمن ان مفيش نشاط للمرض. _باختصار :نتجنب الأشعة فوق البنفسجية ونحاول ان كل انشطة حياتنا اليومية في غير وجود الشمس لكن لو هنضطر نستخدم واقي شمس ودمتم سالمين.